Mozilla, kompania që qëndron pas shfletuesit të njohur Firefox, prej kohësh po punon për krijimin e shërbimit të vet VPN. Tani është njoftuar lançimi i versionit beta të klientit Firefox Private Network VPN, i disponueshëm me abonim për përdoruesit e pajisjeve Android.
Zhvilluesit pohojnë se, ndryshe nga alternativat falas, shërbimi i tyre VPN nuk regjistron trafikun e rrjetit të përdoruesve dhe nuk ruan historinë e faqeve të vizituara. Në përshkrimin e aplikacionit në Play Store ka pak informacion për produktin e ri të Mozilla-s. Në faqen zyrtare të Firefox Private Network VPN thuhet se shërbimi është krijuar në bashkëpunim me zhvilluesit e rrjetit privat virtual me kod të hapur Mulvad VPN. Në vend të protokolleve më tradicionale, si OpenVPN ose IPsec, shërbimi Firefox Private Network bazohet në protokollin WireGuard, i cili ofron shpejtësi më të lartë. Përdoruesit do të mund të lidhen përmes serverëtserverëve, të vendosur në më shumë se 30 vende, duke përdorur njëkohësisht deri në pesë lidhje.
Aktualisht, shërbimi VPN mund të përdoret përmes aplikacionit për platformën Android, si edhe përmes versionit desktop të klientit për Windows 10. Përveç kësaj, Mozilla ka publikuar një zgjerim të veçantë për shfletuesin Firefox. Meqenëse aplikacioni Android është ende në fazën beta, tani për tani ai është i disponueshëm vetëm për një numër të kufizuar përdoruesish. Aktualisht, shërbimi mund të përdoret për 4,99 $ në muaj, por nuk përjashtohet që deri në lançimin e plotë të tij çmimi të rishikohet. Me shumë gjasa, në të ardhmen shërbimi do të bëhet i disponueshëm në më shumë platforma softuerike.
Burimi: 3dnews.ru
