Jyske Bank, banka e tretë më e madhe në Danimarkë, njoftoi javën e kaluar se klientët e saj tani mund të marrin një kredi hipotekare për 10 vjet me një normë interesi fikse prej -0,5%, që do të thotë se klientët do t'i kthejnë bankës një shumë më të vogël se ajo që kanë huazuar.
Me fjalë të tjera, nëse do të blinit një shtëpi me kredi për 1 milion dollarë dhe do ta shlyeni plotësisht hipotekën brenda 10 vjetësh, do t'i kthenit bankës vetëm 995 mijë dollarë.
Për të qenë të drejtë, duhet të theksohet se edhe me një normë interesi negative, bankat shpesh kërkojnë komisione lidhur me procedurën e kreditimit. Kjo do të thotë se klientët përfundimisht do të duhet të paguajnë një shumë më të madhe se sa është huazuar.
«Kjo është një kapitull tjetër në historinë e hipotekës. Disa muaj më parë do të kishim thënë se ishte e pamundur, por nuk ndalemi së habituri dhe kjo hap mundësi të reja për pronarët e shtëpive», tha Mikkel Høegh, ekonomist për kreditë e strehimit në Jyske Bank në një intervistë me televizionin danez.
Norma negative e Jyske Bank është bërë një nga të fundit në një seri ofrimesh alarmante të normave të ulëta nga bankat për pronarët e shtëpive në Danimarkë.
Sipas The Local, kredituesi më i madh në Skandinavi, Nordea Bank, njoftoi se do të ofrojë hipotekë me një normë fikse për 20 vjet me 0%. Burimi Bloomberg raporton se disa kreditues danezë ofrojnë hipotekë 30-vjeçare me normë 0,5%.
Mund të duket e paarsyeshme që bankat të ofrojnë kredi me norma kaq të ulëta, por ka një shpjegim për këtë.
Tregjet financiare aktualisht ndodhen në një pozicion të paqëndrueshëm dhe të pasigurt. Faktorët e rrezikut përfshijnë luftën e vazhdueshme tregtare midis SHBA-së dhe Kinës, Brexit-in dhe ngadalësimin e përgjithshëm të rritjes ekonomike në të gjithë botën, veçanërisht në Evropë.
Shumë investitorë kanë frikë nga një kolaps financiar në të ardhmen e afërt. Prandaj, disa banka janë të gatshme të ofrojnë para në kredi me norma negative, duke marrë mbi vete humbje më të vogla, sesa duke rrezikuar humbje më të mëdha, duke ofruar kredi me norma më të larta, të cilat klientët nuk do të jenë në gjendje t'i kthejnë.
Burimi: 3dnews.ru
