Kompania Google duket se nuk ka ndërmend të heqë dorë nga ideja e një rrjeti social të vetin. Pavarësisht se pak kohë më parë u mbyll Google+, "korporata e të mirave" po teston Shoelace. Kjo është një platformë e re për ndërveprimin social, e cila dallon nga Facebook, "VKontakte" dhe të tjera.
Zhvilluesit e pozicionojnë atë si një zgjidhje për offline. Kështu që përmes Shoelace ofrohet mundësia për të gjetur miq dhe përkrahës në botën reale. Parashikohet se aplikacioni mobil i sistemit do të mundësojë "lidhjen" e njerëzve sipas interesave të përbashkët, duke krijuar njohje për ata që sapo janë shpërngulur dhe duan të takojnë njerëz që jetojnë afër.
Kjo është tashmë përpjekja e tretë e kompanisë për të fituar mendjet dhe zemrat e përdoruesve të rrjeteve sociale. Në vitin 2011, Google lançoi një projekt të ngjashëm, Schemer, por pas tri vitesh e mbylli atë. Përpjekja aktuale përbën, në thelb, një rinisje të këtij sistemi. Ose në Mountain View nuk ishin lodhur mjaftueshëm, ose duan të marrë parasysh gabimet e kaluara.
Raportohet se versioni provues i Shoelace është për momentin i disponueshëm vetëm në SHBA për pajisjet Android dhe iOS. Për të funksionuar kërkohen versione jo më të vjetra se Android 8 dhe iOS 11, si dhe një llogari Google. Në shërbim ka mundësinë e krijimit të një liste të ngjarjeve të interesit, si gara sportive, shfaqje dhe kështu me radhë. Gjithashtu ka një kalendar dhe mundësinë për të ftuar përdorues. Një funksionalitet i ngjashëm ekziston prej kohësh në Facebook, "VKontakte" dhe projekte të tjera, kështu që fëmija i Google do të ketë nevojë të bëjë shumë përpjekje për t'u vënë re.
Burimi: 3dnews.ru
