Korporata Microsoft ka për qëllim të tregojë se sistemi i saj për sigurinë në zgjedhje nuk është vetëm një teori. Zhvilluesit prezantuan sistemin e parë të votimit, në të cilin ishte e angazhuar teknologjia ElectionGuard, e cila duhet të sigurojë një votim më të lehtë dhe më të sigurt.
Pjesa harduerike e sistemit përfshin një tablet Surface, një printer dhe një kontrollues adaptiv Xbox, që e bën votimin më të aksesueshëm për të gjithë. Ky sistem është unik, pasi tregon se komponentët e zakonshëm harduerikë mund të përdoren për të realizuar votimin, të lidhur përmes softuerit.
Pasi votuesi ka votuar përmes tabletit ose kontrolluesit, sistemi ElectionGuard numëron votat duke përdorur kriptimin homomorfik, duke i ruajtur të dhënat në një formë të enkriptuar. Për më tepër, sistemi i ofron çdo votuesi një kod unik, i cili lejon të verifikohet përmes internetit nëse vota është regjistruar saktë. Një nivel shtesë verifikimi është një fletë votimi e shtypur në printer. Votuesi mund të lërë një shenjë përkatëse në të dhe ta vendosë atë në një kuti speciale.
Në Microsoft thonë se versioni 'pilot' i sistemit të sigurt për votim do të përdoret në zgjedhjet në Shtetet e Bashkuara vitin e ardhshëm. Zhvilluesit besojnë se sistemi ElectionGuard duhet të fillojë të përdoret sa më shpejt. Në kompani rikujtojnë se nga kur u shfaq sistemi AccountGuard në vitin 2018, rreth 10,000 klientë janë njoftuar se kanë rënë viktima të thyerjeve të llogarive. Në një deklaratë thuhet se vende të tjera po përpiqen të ndërhyjnë në proceset zgjedhore të Shteteve të Bashkuara duke përdorur sulme kibernetike, prandaj makinat e ndjeshme të votimit mund të bëhen lehtësisht objekt sulmi për hakerat.
Burimi: 3dnews.ru
