Kompania Telegram publikoi në faqen e saj një njoftim, në të cilin sqaroi disa çështje të lidhura me parimet e funksionimit të platformës blockchain Telegram Open Network (TON) dhe kriptomonedhës Gram. Në deklaratë theksohet se kompania nuk do të jetë në gjendje ta kontrollojë platformën pas lançimit dhe gjithashtu nuk do të ketë të drejta të tjera menaxhimi mbi të.
U bë e ditur se portofoli i kriptomonedhës TON Wallet, në fillim do të jetë një aplikacion i veçantë. Zhvilluesit nuk garantojnë se në të ardhmen portofoli do të jetë i integruar me mesazherin e kompanisë. Kjo do të thotë se kompania, së paku në fillim, do të lanzojë një portofol kriptomonedhe të pavarur, i cili do të mund të konkurrojë me zgjidhje të tjera të ngjashme.
Një pikë tjetër e rëndësishme është që Telegram nuk planifikon të zhvillojë platformën TON, duke supozuar se kjo do të bëhet nga komuniteti i zhvilluesve të jashtëm. Telegram nuk merr përsipër të zhvillojë aplikacione për platformën TON, as të krijojë TON Foundation ose ndonjë organizatë të ngjashme në të ardhmen.
Ekipi i zhvilluesve të Telegramit nuk do të jetë në gjendje në asnjë mënyrë të kontrollojë platformën e kriptomonedhës pas lançimit, dhe gjithashtu nuk garanton se mbajtësit e tokenëve Gram do të mund të pasurohen nga ata. Theksohet se blerja e kriptomonedhës është një biznes me rrezik, pasi vlera e saj mund të ndryshojë ndjeshëm për shkak të volatilit dhe veprimeve të autoriteteve rregullatore në lidhje me bursat e kriptomonedhave. Kompania beson se Gram nuk është një produkt investimi, por e pozicionon kriptomonedhën si një mjet shkëmbimi midis përdoruesve, të cilët do të përdorin platformën TON në të ardhmen.
Në njoftim thuhet se Telegram ende ka ndërmend të lansojë platformën blockchain dhe kriptomonedhën. Kjo duhej të kishte ndodhur që prej vjeshtës së vitit 2019, por për shkak të padisë së Komisionit të Letrave me Vlerë dhe Tregjeve të SHBA (SEC), lançimi është vonuar. Vlen të theksohet se aktualisht kriptomonedha Gram nuk është në shitje dhe faqet që pretendonin të shpërndanin tokenë janë mashtruese.
Kujtojmë, së fundmi u bë e ditur se SEC është drejtuar në gjykatën federale të SHBA me një padi, duke kërkuar që Telegram të zbulojë informacion mbi mënyrën si po shpenzohen investimet prej $1.7 miliardë, të mbledhura gjatë ICO dhe të destinuara për zhvillimin e TON dhe Gram.
Burimi: 3dnews.ru
