Në Kinë u prodhua prototipi i trenit maglev, që zhvillon një shpejtësi prej 600 km/h

Treni i ri superbrisk i maglevit, i aftë të arrijë shpejtësi deri në 600 km/h, ka bërë një hap tjetër më afër realitetit në Kinë.

Të enjten u shpall përfundimi i montimit të prototipit të mjeteve në mbështetje magnetike në Qingdao, qytet port në provincën Shandong në lindje të Kinës.

I krijuar nga korporata shtetërore China Railway Rolling Stock Corporation (CRRC), furnizuesi më i madh në botë për pajisjet e transportit hekurudhor, treni maglev pritet të fillojë prodhimin komercial në vitin 2021 pas testimeve të gjera.

Pjesëmarrësit në projekt shohin me optimizëm të ardhmen e trenit të ri maglev, duke besuar se ai do të transformojë plotësisht peizazhin turistik të Kinës, duke reduktuar dallimin midis transportit hekurudhor me shpejtësi të lartë dhe udhëtimeve ajrore.  

"Merrni si shembull udhëtimin nga Pekini në Shangai. Duke marrë parasysh kohën e përgatitjes, udhëtimi me avion do të zgjasë rreth 4.5 orë, udhëtimi me transport hekurudhor me shpejtësi të lartë do të marrë rreth 5.5 orë dhe rreth 3.5 orë [do të marrë udhëtimi] me [të riun] maglev me shpejtësi të lartë", theksoi në deklaratën e tij zëvendës inxhineri kryesor i CRRC Ding Sansan, kreu i ekipit zhvillues të trenit maglev.

Ndërsa shpejtësia mesatare e një avioni është 800–900 km/h, shpejtësia maksimale operative e trenave në rrugën Beijing–Shangai aktualisht është 350 km/h.

Duhet theksuar se prototipi i ri i trenit maglev në Kinë nuk do të jetë treni i parë që kalon pragun prej 600 km/h kur të dërgohet në poligonin e testimeve.

Në vitin 2015, maglevi i kompanisë japoneze Central Japan Railway arriti në linjën testuese në Yamanashi shpejtësinë 603 km/orë, duke vendosur një rekord të ri botëror.

Burimi: 3dnews.ru