Komiteti i Mbrojtjes i Parlamentit të Mbretërisë së Bashkuar planifikon të shqyrtojë shqetësimet e sigurisë në lidhje me përdorimin e rrjeteve mobile 5G, tha një grup ligjvënësish të premten, duke iu përgjigjur presionit nga SHBA-të dhe shqetësimeve të vazhdueshme publike në lidhje me rreziqet e përdorimit të pajisjeve nga Huawei i Kinës.
Në janar të këtij viti, qeveria e kryeministrit britanik Boris Johnson autorizoi përdorimin e pajisjeve të palëve të treta, përfshirë atë të Huawei, në ndërtimin e seksioneve jo-thelbësore të rrjeteve të gjeneratës së pestë (5G) dhe fibrave optike të vendit. Ky veprim sfidoi presionin e SHBA-së për të ndaluar plotësisht pajisjet nga kompanitë kineze për shkak të shqetësimeve për spiunazh të mundshëm nga autoritetet kineze.
Siguria e teknologjisë 5G do të jetë tani objekt i një hetimi nga një nënkomision i Komitetit Parlamentar të Mbrojtjes. Një nga hetuesit, deputeti Tobias Ellwood, deklaroi se sapo rrjetet 5G të jenë funksionale, ato do të bëhen një pjesë "integrale" e infrastrukturës së Mbretërisë së Bashkuar. "Është thelbësore që kur diskutojmë për teknologjinë e re, të bëjmë pyetje të vështira në lidhje me potencialin për abuzim", shkroi ai në Twitter.
Zëvendëspresidenti i Huawei, Victor Zhang, tha në një deklaratë me email se kompania do të bashkëpunonte me komisionin për t'iu përgjigjur të gjitha pyetjeve. "Gjatë 18 muajve të fundit, qeveria dhe dy komisione parlamentare kanë kryer një vlerësim të plotë faktik dhe kanë arritur në përfundimin se nuk ka bazë për të ndaluar Huawei-n nga furnizimi me pajisje 5G për arsye të sigurisë kibernetike", shtoi ai.
Burimi: 3dnews.ru
