SpaceX dhe Administrata Kombëtare e Aeronautikës dhe Hapësirës e SHBA (NASA) po hetojnë aktualisht shkakun e anomalisë që çoi në dështimin e motorit në kapsulën e Crew Dragon të projektuar për të transportuar astronautët në Stacionin Ndërkombëtar të Hapësirës. Ngjarja ka ndodhur më 20 prill dhe fatmirësisht nuk ka pasur viktima apo të lënduar.
Sipas një përfaqësuesi të SpaceX, një anomali ka ndodhur gjatë testimit në tokë të kapsulës Crew Dragon që çoi në aksident.
Pas këtij incidenti, shtëllunga tymi portokalli u panë mbi zonën e testimit në Cape Canaveral, Florida dhe një video e një shpërthimi të shoqëruar me flakë u shfaq në Twitter. Pas ca kohësh, kjo video u fshi.
Informacioni për këtë ngjarje është jashtëzakonisht i pakët. Ka mundësi që të ketë ndodhur një shpërthim dhe të jetë shkatërruar kapsula e Crew Dragon. Megjithatë, NASA këmbëngul se hetimi për incidentin e anijes kozmike do të marrë kohë dhe bën thirrje për durim.
Sipas Patricia Sanders, kreu i Panelit Këshillimor të Sigurisë Hapësinore të NASA-s (ASAP), testi përsëriti një situatë në të cilën një raketë Falcon 9 që mbante Crew Dragon u copëtua papritur, duke bërë të nevojshme një ndarje emergjente të kapsulës.
Sanders vuri në dukje se gjatë testimit, 12 nga motorët më të vegjël kompakt Draco të përdorur për manovrim në hapësirë funksionuan normalisht, por testimi i SuperDraco rezultoi në një situatë jonormale, megjithëse askush nuk u lëndua.
Burimi: 3dnews.ru