Намояндагони Фейсбук тафтишот эълон карданд, ки дар натиҷаи он садҳо аккаунти қалбакӣ аз ИМА, Ветнам ва Гурҷистон масдуд шуданд, ки дар доираи маъракаҳои густурда барои таҳрики афкори ҷамъиятӣ дар шабакаҳои иҷтимоии Facebook ва Instagram истифода мешуданд.
Қайд карда мешавад, ки дар ин ҳисобҳо аксҳое истифода мешуданд, ки бо истифода аз технологияҳои зеҳни сунъӣ сохта шудаанд, ки шинохтани фиребро бо чашми одӣ ниҳоят мушкил кардааст. Дар ин бора Натаниэл Глейчер, раҳбари киберамният дар Facebook хабар дод.
Дар маҷмӯъ 610 аккаунт, 89 саҳифа ва 156 гурӯҳ дар шабакаи иҷтимоии Фейсбук ва ҳамчунин 72 аккаунт дар Instagram баста шуданд. Маъмурияти Facebook аксари ҳисобҳои масдудшударо ба Epoch Media Group, ки нашрияи консервативии The Epoch Times нашр мекунад, пайванд медиҳад.
Гуфта мешавад, ки дар чаҳорчӯби ин маърака барои таблиғ дар шабакаҳои иҷтимоӣ ҳудуди 9 миллион доллар масраф шудааст.Мӯҳтавое, ки тавассути аккаунтҳои қалбакӣ нашр мешуд, асосан барои корбарони ИМА ва Ветнам пешбинӣ шудааст.
Илова бар ин, таҳиягарон як шабакаи хеле калони ҳисобҳои қалбакиро дар Гурҷистон муайян ва бастаанд. Он 39 ҳисоб ва зиёда аз 300 саҳифаро дар бар мегирад. Тахмин меравад, ки ин шабака бо ҳукумати Гурҷистон иртибот дорад ва ҳадафаш ташаккули андешаи мусбат дар бораи ҳукумати феълӣ ва интиқод аз аҳзоби мухолиф будааст.
Фейсбук мегӯяд, кашфи аккаунтҳои қалбакӣ нишон медиҳад, ки абзорҳое, ки барои паҳн кардани маълумоти бардурӯғ ва манипуляцияи афкори ҷамъиятӣ истифода мешаванд, чӣ гуна таҳаввул меёбанд. Суратҳо барои профилҳои қалбакӣ бо истифода аз алгоритмҳо дар асоси шабакаҳои нейрон бо омӯзиши мошинсозӣ сохта шудаанд. Аммо як намояндаи Фейсбук қайд кард, ки аксҳои бо ин роҳ сохташуда ба системаҳои автоматии ширкат аз муайян кардани аккаунтҳои қалбакӣ монеъ намешаванд, зеро ин раванд ба таҳлили рафтори аккаунт асос ёфтааст.
Манбаъ: 3dnews.ru