Идораи рақобати Фаронса қароре содир кард, ки аз Google талаб мекунад, ки ба нашрияҳои маҳаллӣ ва агентиҳои хабарӣ барои мундариҷаи истифодаашон пул пардохт кунад. Ҳалли муваққатии ин масъала аз замони эътибор пайдо кардани Қонуни ҳуқуқи муаллифии Иттиҳоди Аврупо дар Фаронса амал мекунад. Тибқи он, аз моҳи октябри соли гузашта Google бояд ба ноширон барои порчаҳои истифодашудаи мақолаҳояшон пул пардохт кунад.
Мақомоти зиддиинҳисории Фаронса бар ин назаранд, ки Google "аз мавқеи бартарии худ сӯиистифода карда, ба бахши чопӣ зарари ҷиддӣ мерасонад". Намояндаи Google дар шарҳи ин масъала тасдиқ кард, ки ширкат ният дорад талаботи танзимкунандаро риоя кунад. Зимнан зикр гардид, ки Google соли гузашта, вақте ки қонуни дахлдор эътибор пайдо кард, ба ҳамкорӣ бо ноширон шурӯъ намуда, сармоягузорӣ ба хабарҳоро афзоиш дод.
Бо вуҷуди ин, танзимкунанда қайд кард, ки "бисёре аз ноширони бахши матбуот ба Google иҷозатномаи истифода ва намоиши мундариҷаи ҳуқуқи муаллифиро додаанд, аммо ҳеҷ гоҳ аз ширкат ҷуброни пулӣ нагирифтаанд." Гумон меравад, ки ноширон маҷбур шуданд, ки мундариҷаро ройгон диҳанд, зеро Google 90% бозори муҳаррикҳои ҷустуҷӯиро дар Фаронса дорад. Дар акси ҳол, ноширон метавонанд аз коҳиши трафики корбарон зарар диданд, агар порчаҳои мақолаҳои онҳо дар натиҷаҳои ҷустуҷӯи Google нашр нашаванд.
Ин тасмими хадамоти зиддиинҳисорӣ пас аз ворид шудани шикоятҳо аз чанд расонаи хабарӣ ва созмонҳои коргарӣ гирифта шудааст. Ҳангоме ки Google бо ноширон музокира мекунад, ширкат бояд тибқи созишномаҳои ҷории худ (бемузд) намоиши порчаҳои хабарӣ, аксҳо ва видеоҳоро идома диҳад. Вақте ки тарафҳо ба созиш расиданд, Google бояд то моҳи октябри соли 2019 ҷубронпулӣ пардохт кунад.
Манбаъ: 3dnews.ru