Майкрософт гуфт, як гурӯҳи ҳакерӣ, ки бовар меравад, бо ҳукумати Эрон иртибот дошта бошад, маъракаеро анҷом додааст, ки ҳисоби афроди марбут ба яке аз номзадҳои раёсати ҷумҳурии Амрикоро ҳадаф қарор додааст.
Дар гузориш гуфта мешавад, ки мутахассисони Microsoft аз гурӯҳи бо номи Phosphorous дар киберфазо фаъолияти "ҷиҳат" сабт кардаанд. Ҳадафи ин амали ҳакерҳо рахна кардани ҳисобҳои мансабдорони феълӣ ва собиқи ҳукумати Амрико, рӯзноманигороне, ки сиёсати ҷаҳониро пӯшиш медиҳанд ва ҳамчунин эрониёни саршиноси муқими хориҷа буданд.
Тибқи маълумоти Microsoft, дар тӯли 30 рӯз дар моҳҳои август-сентябр, ҳакерҳои Phosphorous беш аз 2700 кӯшиши мусодираи маълумоти эътимоднома аз ҳисобҳои почтаи электронии одамони гуногунро анҷом дода, ба 241 ҳисоб ҳамла карданд. Дар ниҳоят, ҳакерҳо чаҳор аккаунтеро, ки бо номзади президенти ИМА алоқаманд набуданд, рахна карданд.
Дар паём ҳамчунин гуфта мешавад, ки амалҳои гурӯҳи ҳакерӣ "аз ҷиҳати техникӣ махсусан мураккаб набуданд". Бо вуҷуди ин, ҳамлагарон дар ихтиёри худ маълумоти зиёди шахсии шахсонеро доштанд, ки ҳисобҳои онҳо мавриди ҳамла қарор гирифтаанд. Дар асоси ин, Microsoft ба хулосае омад, ки ҳакерҳои Phosphorous ҳавасмандии хуб доранд ва омодаанд вақти заруриро барои ҷамъоварии маълумот дар бораи қурбониёни эҳтимолӣ ва омода кардани ҳамлаҳо сарф кунанд.
Microsoft аз соли 2013 фаъолияти гурӯҳи Phosphorous-ро пайгирӣ мекунад. Моҳи марти соли ҷорӣ намояндагони Microsoft эълон карданд, ки ширкат ҳукми додгоҳро гирифтааст, ки бар асоси он 99 вебсайте, ки ҳакерҳои Phosphorous барои анҷоми ҳамлаҳо истифода мекарданд, таҳти назорат гирифта шудаанд. Мувофиқи Microsoft, гурӯҳи мазкур инчунин бо номи ART 35, Charming Kitten ва Ajax Security Team маълум аст.
Манбаъ: 3dnews.ru