Reuters agentligining xabar berishicha, G‘arb razvedka agentliklarida ishlovchi xakerlar 2018-yil oxirida Rossiyaning Yandex qidiruv tizimini buzib, foydalanuvchi akkauntlariga josuslik qilish uchun nodir turdagi zararli dasturlarni joriy qilgan.
Hisobotda aytilishicha, hujum AQSh va Buyuk Britaniyadan tashqari Avstraliya, Yangi Zelandiya va Kanadani o‘z ichiga olgan “Besh ko‘z” alyansi tomonidan qo‘llanilgan Regin zararli dasturi yordamida amalga oshirilgan. Bu mamlakatlar razvedka xizmatlari vakillari hozircha bu xabarga izoh bermagan.
Qayd etish joizki, G‘arb davlatlarining Rossiyaga qarshi kiberhujumlari kamdan-kam hollarda e’tirof etiladi va omma oldida muhokama qilinmaydi. Nashr manbasining xabar berishicha, Yandex’ga qilingan hujum ortida qaysi davlat turganini aniqlash ancha mushkul. Unga ko‘ra, zararli kodni joriy etish 2018-yilning oktabr va noyabr oylari oralig‘ida amalga oshirilgan.
Yandex vakillari ko'rsatilgan vaqt ichida qidiruv tizimi haqiqatan ham hujumga uchraganini tan oldi. Shu bilan birga, ta'kidlanishicha, Yandex xavfsizlik xizmati shubhali faoliyatni dastlabki bosqichda aniqlay olgan, bu esa xakerlar har qanday zarar yetkazishidan avval tahdidni to‘liq zararsizlantirish imkonini bergan. Ta`kidlanishicha, hujum natijasida foydalanuvchi ma`lumotlari buzilmagan.
Xakerlik hujumi haqida xabar bergan Reuters manbasiga ko‘ra, hujumchilar Yandex foydalanuvchilarni qanday autentifikatsiya qilishini tushunish imkonini beruvchi texnik ma’lumotlarni olishga harakat qilishgan. Bunday ma'lumotlar bilan razvedka idoralari o'zini Yandex foydalanuvchilariga taqlid qilib, ularning elektron pochtalariga kirishlari mumkin edi.
Eslatib o'tamiz, Regin zararli dasturi 2014 yilda Milliy xavfsizlik agentligining (NSA) sobiq xodimi Edvard Snouden bu haqda birinchi marta gapirganida "Besh ko'z" alyansi vositasi sifatida aniqlangan edi.
Manba: 3dnews.ru