AQSh prezidenti Donald Tramp ma`muriyatining yuqori lavozimli amaldorlari Xitoyning Huawei Technologies kompaniyasiga global chiplar yetkazib berishni cheklashga qaratilgan yangi choralarni tayyorlamoqda. Bu haqda Reuters axborot agentligi xabardor manbasiga tayanib xabar berdi.
Ushbu oʻzgarishlarga koʻra, chiplar ishlab chiqarish uchun Amerika uskunasidan foydalanadigan xorijiy kompaniyalar AQSh litsenziyasini olishlari kerak boʻladi, unga koʻra ularga Huawei kompaniyasiga maʼlum turdagi mahsulotlarni yetkazib berishga ruxsat beriladi yoki ruxsat berilmaydi.
Dunyo bo'ylab ishlatiladigan chip ishlab chiqarish uskunalarining aksariyati Amerika texnologiyasiga asoslanganligi sababli, yangi cheklovlar AQShning yarimo'tkazgichlar eksportini nazorat qilish vakolatlarini sezilarli darajada kengaytiradi, bu esa savdo mutaxassislarining fikricha, ko'plab amerikalik ittifoqchilarni g'azablantiradi.
Xabarda aytilishicha, qaror bugun bo‘lib o‘tgan AQSh yuqori martabali amaldorlari va turli institutlar vakillarining rasmiy uchrashuvida qabul qilingan. U AQShda ishlab chiqarilgan texnologiya yoki dasturiy ta'minotga asoslangan xorijda ishlab chiqarilgan ba'zi mahsulotlarni AQSh qoidalariga bo'ysundiradi.
AQSh prezidenti bu taklifni ma'qullaydimi yoki yo'qmi hozircha noma'lum, chunki o'tgan oy u bunday choralarga qarshi chiqqan edi. Bunday qarorlarni qabul qilishda muhim rol o‘ynaydigan AQSh Savdo vazirligi vakillari hozircha bu masalaga munosabat bildirishmagan.
Manba: 3dnews.ru