დიდ ბრიტანეთში ჰაკერების ინსტრუმენტების გაყიდვის ვებგვერდი დაიხურა - მფლობელები და მყიდველები დაისჯებიან

საერთაშორისო საპოლიციო გამოძიების შემდეგ, დიდ ბრიტანეთში დაიხურა ვებსაიტი Imminent Methods, რომელიც ყიდის ჰაკერულ ინსტრუმენტებს, რომლებიც თავდამსხმელებს საშუალებას აძლევს, მომხმარებლების კომპიუტერებზე კონტროლი აიღონ.

 

დიდი ბრიტანეთის ეროვნული დანაშაულის სააგენტოს (NCA) მონაცემებით, დაახლოებით 14,500 ადამიანმა ისარგებლა Imminent Methods-ის მომსახურებით. დამნაშავეების მოსაძებნად, სამართალდამცავებმა მსოფლიოს 80-ზე მეტ ადგილას ჩაატარეს ჩხრეკა. კერძოდ, დიდ ბრიტანეთში ჩხრეკა ჩატარდა ჰალში, ლიდსში, ლონდონში, მანჩესტერში, მერსისაიდში, მილტონ კინსში, ნოტინგემში, სომერსეტსა და სურეიში.

პოლიციამ ასევე მოახერხა იმ პირების კვალდაკვალ მოძიება, რომლებმაც ჰაკერული პროგრამული უზრუნველყოფა შეიძინეს. მათ ბრალი წაუყენებენ კომპიუტერის ბოროტად გამოყენებას. საერთაშორისო ოპერაციას ავსტრალიის ფედერალური პოლიცია ხელმძღვანელობდა.

პოლიციის ცნობით, ჰაკერული პროგრამული უზრუნველყოფის გაყიდვასა და გამოყენებასთან დაკავშირებით სულ 14 ადამიანი დააკავეს.

ვებსაიტზე კონტროლის აღებით, პოლიცია შეძლებს მის საქმიანობას დეტალურად გაეცნოს და დაადგინოს იმ პირების ვინაობა, ვინც უკანონო ინსტრუმენტები შეიძინა, ამბობს სურეის უნივერსიტეტის კიბერუსაფრთხოების ექსპერტი, პროფესორი ალან ვუდვორდი.

„ხელისუფლებამ ახლა უკვე იცის, რამდენმა მომხმარებელმა შეიძინა მავნე პროგრამა. ახლა ისინი იმუშავებენ იმ 14,500 ადამიანის გამოსავლენად, რომლებიც საკმარისად სულელები იყვნენ მის საყიდლად“, - აღნიშნა ვუდვორდმა.

წყარო: 3dnews.ru