ABŞ prezidenti Donald Trampın administrasiyasının yüksək vəzifəli məmurları Çinin Huawei Technologies şirkətinə qlobal mikroçip tədarükünü məhdudlaşdırmaq üçün yeni tədbirlər hazırlayırlar, Reuters məsələ ilə bağlı məlumatlı mənbəyə istinadən xəbər verir.
Dəyişikliklərə əsasən, çiplər istehsal etmək üçün Amerika avadanlıqlarından istifadə edən xarici şirkətlərdən “Huawei” şirkətinə müəyyən məhsulların tədarükünü həyata keçirməyə imkan verən ABŞ lisenziyası tələb olunacaq.
Dünyada istifadə edilən çip istehsalı üçün avadanlıqların çoxu Amerika texnologiyasına əsaslandığı üçün yeni məhdudiyyətlər ABŞ-ın yarımkeçiricilər ixracına nəzarət etmək səlahiyyətini əhəmiyyətli dərəcədə genişləndirəcək və ticarət ekspertlərinin fikrincə, bu, bir çox Amerika müttəfiqlərini qəzəbləndirəcək.
Açıqlamada deyilir ki, bu qərar ABŞ-ın yüksək rütbəli rəsmiləri və müxtəlif qurumların nümayəndələrinin bu gün keçirilən rəsmi görüşündə qəbul edilib. Qərara əsasən, ABŞ mənşəli texnologiya və ya proqram təminatı əsasında xaricdə istehsal olunan bəzi mallar ABŞ qaydalarına tabe olacaq.
ABŞ prezidentinin bu təklifi təsdiq edib-etməyəcəyi hələlik məlum deyil, çünki o, ötən ay belə tədbirlərə qarşı çıxıb. Belə qərarların verilməsində əsas rol oynayan ABŞ Ticarət Nazirliyinin nümayəndələri hələlik məsələ ilə bağlı açıqlama verməyiblər.
Mənbə: 3dnews.ru
