Bu gün Facebook ilk dəfə olaraq bir istifadəçinin paylaşımını “yalan məlumat” kimi qeyd edib. Bu, Sinqapur hökumətinin müraciətindən sonra edilib, çünki ölkədə saxta xəbərlərə və onlayn manipulyasiyaya qarşı mübarizə haqqında qanun qüvvəyə minib.
Sinqapurdakı Facebook istifadəçilərinə göstərilən bildirişdə deyilir: "Facebook qanunla Sinqapur hökumətinin bu yazıda yalan məlumat ehtiva etdiyini müəyyən etdiyini sizə bildirməlidir".
Müvafiq qeyd istifadəçi postunun altında yerləşdirilib, lakin mesajın mətni dəyişdirilməyib. Sözügedən yazı müxalifətin “States Times Review” bloqunu idarə edən istifadəçi tərəfindən edilib. Mətn ölkənin hakim partiyasını ifşa edən sinqapurlunun həbsinə aiddir.
Lakin hüquq-mühafizə orqanlarının əməkdaşları həbsi təkzib ediblər. Sinqapur səlahiyyətliləri əvvəlcə yazının müəllifi ilə əlaqə saxlayıb, geri çəkilməsini tələb ediblər, lakin o, Avstraliyada yaşadığı üçün bundan imtina edib. Nəticədə Sinqapur rəsmiləri Facebook-a şikayət etmək məcburiyyətində qalıb, bundan sonra yazıya “yalan məlumat” işarəsi qoyulub.
"Sinqapur qanunlarına uyğun olaraq, Facebook mübahisəli yazıya hökumətin qeyri-dəqiq hesab etdiyi xüsusi etiket tətbiq edib. Qanun yeni qüvvəyə mindiyi üçün ümid edirik ki, bundan hakimiyyət tərəfindən azad sözü məhdudlaşdırmaq üçün istifadə edilməyəcək", - Facebook sözçüsü bildirib.
Qeyd edək ki, Facebook tez-tez bəzi ölkələrin qanunlarını pozan məzmunu bloklayır. Şirkətin bu yay fəaliyyəti ilə bağlı dərc edilən hesabatda 2019-cu ilin iyun ayına qədər müxtəlif ölkələrdə təxminən 18 000 belə hal qeydə alındığı bildirilir.
Mənbə: 3dnews.ru
