Дзяржаўная карпарацыя Раскосмас паведамляе аб тым, што ракета-носьбіт "Саюз-2.1а" абраная Карэйскім інстытутам астраноміі і касмічных навук (KASI) для запуску сваіх невялікіх спадарожнікаў CubeSat у рамках місіі SNIPE.
Праграма SNIPE (Small scale magNetospheric and Ionospheric Plasma Experiment) – «Даследаванні лакальных уласцівасцяў магнітасфернай і іёнасфернай плазмы» – прадугледжвае разгортванне групоўкі з чатырох касмічных апаратаў CubeSat памерам 6U. Праект рэалізуецца з 2017 года.
Прадугледжваецца, што спадарожнікі будуць выведзены на палярную арбіту вышынёй 600 км. Адлегласці паміж імі будуць падтрымлівацца ў межах ад 100 м да 1000 км з дапамогай алгарытму палёту групоўкі.
Галоўнымі мэтамі місіі названы даследаванні тонкіх структур асаджэнняў высокаэнергетычных электронаў, шчыльнасці/тэмпературы фонавай плазмы, падоўжных токаў і электрамагнітных хваляў.
Спецыялісты маюць намер вывучыць анамаліі ў высокіх шыротах, такія як лакальныя зоны ў палярных шапках, падоўжныя токі ў авале палярных ззянняў, электрамагнітныя іённа-цыклатронныя хвалі, лакальны мінімум шчыльнасці плазмы ў прыпалярнай вобласці і інш.
Чатыры спадарожнікі праграмы SNIPE будуць запушчаныя ў двух кантэйнерах памерам 12U. Старт ракеты "Саюз-2.1а" з гэтымі і іншымі апаратамі будзе ажыццёўлены з касмадрома Байканур у першым або ў другім квартале 2021 года.
Крыніца: 3dnews.ru
