Коммерциялық келісімшарттар бойынша «Ангара» ауыр зымыран тасығышының алғашқы ұшырылымдары алдағы онжылдықтың ортасынан ерте емес ұйымдастырылады. Бұл туралы International Launch Services (ILS) хабарлады, деп хабарлайды ТАСС.
Еске салайық, ILS ресейлік ауыр класты «Протон» зымыран тасығышын және перспективалық «Ангара» ғарыштық зымыран жүйесін маркетингтік және коммерциялық пайдаланудың айрықша құқығына ие. ILS компаниясы АҚШ-та тіркелген, ал акциялардың бақылау пакеті М.В.Хруничев атындағы Ресей мемлекеттік ғарыштық ғылыми-өндірістік орталығына тиесілі.
ILS президенті Кирк Пишер атап өткендей, жаңа ресейлік ауыр класты «Ангара» тасығышының коммерциялық ғарыштық ұшырылымдары 2025 жылдан ерте емес басталады. Сонымен бірге, ILS басшысы компанияның алдағы уақытта осы зымыранмен жұмысты ұйымдастыруға ниетті екенін растады.
«Біз Ангараның коммерциялық ұшырылымын шамамен 2025 жылға дейін күтпейміз. Содан кейін өтпелі кезең болады және ол 2026-2027 жылдары аяқталуы мүмкін», - деді ILS басшысы.
Ауыр класты Ангара-А5 тасығышының алғашқы ұшырылымы 2014 жылдың желтоқсан айында өтті. Келесі ұшыру ағымдағы жылдың желтоқсан айына жоспарланған.
Ақпарат көзі: 3dnews.ru