Бүгін Facebook әлеуметтік желісінде алғаш рет қолданушы жариялаған хабарлама «дәл емес ақпарат» деп белгіленді. Бұл Сингапур үкіметінің үндеуінен кейін жасалды, өйткені ел интернеттегі жалған жаңалықтармен және манипуляциялармен күресу туралы заң енгізді.
«Заң бойынша Facebook Сингапур үкіметі бұл жазбада жалған ақпарат бар деп мәлімдегенін хабарлауы қажет», - делінген Сингапурдағы Facebook қолданушыларына көрсетілген хабарламада.
Тиісті ескертпе пайдаланушы жарияланымының астына қойылды, бірақ хабарлама мәтіні өзгертілмеді. Қарастырылып отырған басылымды оппозициялық States Times Review блогын басқаратын қолданушылардың бірі жариялады. Мәтін елдегі билеуші партияны айыптаған сингапурлықтың қамауға алынуына қатысты.
Алайда құқық қорғау органдары қамауға алынғаны туралы ақпаратты жоққа шығарды. Бастапқыда Сингапур билігі басылым авторына теріске шығаруды талап етіп хабарласқан, бірақ ол Австралияда тұратындықтан бас тартты. Нәтижесінде Сингапур билігі Facebook-ке шағым жіберуге мәжбүр болды, содан кейін хабарлама «жалған ақпарат» деп белгіленді.
«Сингапур заңы талап еткендей, Facebook даулы жазбаға арнайы белгі қойды, оны Сингапур үкіметі қате деп анықтады. Заң жақында ғана күшіне енгендіктен, билік оны сөз бостандығын шектеу үшін пайдаланбайды деп сенеміз», – дейді әлеуметтік желі өкілі.
Айта кетейік, Facebook белгілі бір елдердің заңдарын бұзатын мазмұнды жиі бұғаттайды. Осы жазда жарияланған компания қызметі туралы есепте 2019 жылдың маусымына дейін әртүрлі елдерде мұндай 18 000-ға жуық жағдай тіркелгені айтылған.
Ақпарат көзі: 3dnews.ru